ភ្នំពេញ៖ បារាំងសម្រេចផ្តល់ជំនួយ ២០០ ០០០ អឺរ៉ូ ដែលស្មើនឹងប្រមាណ ២៣ម៉ឺនដុល្លារអាមេរិក ដល់កញ្ចប់ថវិកាឆ្នាំ២០២២ របស់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលធ្វើឱ្យជំនួយសរុបដែលប្រទេសបារាំងផ្តល់ជូនអ.វ.ត.ក មានចំនួន ៦,៩លានអឺរ៉ូចាប់តាំងពីតុលាការនេះត្រូវបានបង្កើត។
តាមការបង្ហោះផ្សាយលើទំព័រហ្វេសបុកផ្លូវការរបស់ស្ថានទូតបារាំងនៅកម្ពុជាបានឱ្យដឹងថា ការផ្តល់ជំនួយហិរញ្ញវត្ថុថ្មីខាងលើត្រូវបានប្រកាសក្នុងអំឡុងនៃកិច្ចប្រជុំនៃក្រុមមិត្តអ.វ.ត.ក ធ្វើឡើងនៅព្រឹកថ្ងៃទី១៥ ខែកុម្ភៈ ដែលជាឱកាសនៃការពិភាក្សាផ្លាស់ប្តូរយោបល់គ្នាជាមួយតំណាងរដ្ឋបាលនៃអ.វ.ត.ក និងតំណាងស្ថានទូតជាច្រើនដែលចូលរួមស្តីពីសេចក្តីសម្រេចថ្មីៗរបស់អ.វ.ត.ក កាលវិភាគរបស់ អ.វ.ត.ក ការជះឥទ្ធិពលនៃជំងឺកូវីដ-១៩ លើសកម្មភាពរបស់អ.វ.ត.ក ការបំពេញមុខងារដែលនៅសេសសល់របស់អ.វ.ត.ក ក្រោយការបញ្ចប់អាណត្តិរបស់ខ្លួន។
គួររំលឹកផងដែរថា នៅឆ្នាំ១៩៩៧ រាជរដ្ឋាភិបាលកម្ពុជាបានសំណូមពរឲ្យអង្គការសហប្រជាជាតិជួយឧបត្ថម្ភបង្កើតសាលាជម្រះក្ដី ដើម្បីកាត់ទោសមេដឹកនាំជាន់ខ្ពស់ខ្មែរក្រហម។ នៅឆ្នាំ២០០១ រដ្ឋសភាជាតិកម្ពុជាបានអនុម័តច្បាប់មួយដើម្បីបង្កើតតុលាការកាត់សេចក្ដីឧក្រិដ្ឋកម្មដែលបានប្រព្រឹត្ដឡើងនៅប្រទេសកម្ពុជាក្នុងអំឡុងរបបខ្មែរក្រហមពីឆ្នាំ ១៩៧៥-១៩៧៩។ តុលាការនេះមានឈ្មោះថា អង្គជំនុំជម្រះវិសាមញ្ញក្នុងតុលាការកម្ពុជា ដើម្បីកាត់សេចក្ដីឧក្រិដ្ឋកម្មដែលបានប្រព្រឹត្ដឡើងក្នុងរបបកម្ពុជាប្រជាធិបតេយ្យ (អង្គជំនុំជម្រះវិសាមញ្ញ ឬ អ.វ.ត.ក) ។
រាជរដ្ឋាភិបាលកម្ពុជាបានទទូចសុំថា ដើម្បីជាផលប្រយោជន៍ដល់ប្រជាជនកម្ពុជាទាំងអស់ តុលាការជម្រះក្ដីត្រូវប្រព្រឹត្ដទៅនៅក្នុងប្រទេសកម្ពុជា ដោយប្រើប្រាស់មន្ដ្រីនិងចៅក្រមកម្ពុជា គួបផ្សំជាមួយមន្ដ្រីនិងចៅក្រមអន្ដរជាតិ។ កម្ពុជាបានអញ្ជើញសហគមន៍អន្ដរជាតិឲ្យចូលរួមសហការក្នុងការកាត់សេចក្ដីនេះ ដើម្បីធានាឲ្យមានយុត្ដិធម៌ជាលក្ខណៈអន្ដរជាតិ ព្រោះកម្ពុជាយល់ឃើញថាខ្លួននៅទន់ខ្សោយផ្នែកតុលាការ និងចរិតលក្ខណៈអន្ដរជាតិនៃឧក្រិដ្ឋកម្ម៕
